De Arbeitsgemeenschup Kulturtourismus stellt sik vör
In’n Nordwesten von Düütschland liggt dat fröhere Land Ollnborg. Dat Ollnborger Land geiht von de Nordsee bit na de Dammer Barge un von de Weser bit Ostfreesland. Hier gifft dat veel to sehn.
För Besöker, de mehr över Land un Lü weten wüllt, beet över 350 Gästeföhrerinnen un Gästeföhrer in rund 30 Örter un Städten Touren to Foot, mit’n Rad oder mit’n Bus an.
All de Gästeföhrer und Gästeföhrerinnen, de up de Sieten von disse Homepage ehre Touren anbeet, hebbt de Utbilden „Gästeführen mit Stern“ bi de „Ländliche Erwachsenenbildung (LEB)“ in Tosamenarbeit mit de Ollnborgische Landschup maakt.
2009 hebbt sik vele Gästeföhrerkoppels ut’t Ollnborger Land to de Arbeitsgemeenschup Kulturtourismus (AG Kulturtourismus) tohoop daan. De AG sett sik för de överregionale Tosamenarbeit, dat Bekanntmaken von „Gästeführen mit Stern“ un för Ut- un Wieterbilden von Gästeföhrer un Gästeföhrerinnen in.
Gästeföhrungen hebbt een besunner Bedüden för use Kultur. De Gästeföhrer un Gästeföhrerinnen kaamt direkt mit de Besöker tohoop, un köönt so up de Stä Antwurten up Fragen un Utkunft to Kulturdenkmalen, Land un Lü geven.
Kiek Se doch mal bi us to. Wi freut us.
Ehre Gästeföhrer un Gästeföhrerinnen ut Ollnborger Land